Khmer Herald: news

Showing posts with label news. Show all posts

Thursday, May 11, 2017

ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង ដោយមានការប្រទះឃើញសាកសព ស្ត្រីម្នាក់ ដែលត្រូវជាប្រពន្ធក្រោយ របស់តារា កំប្លែងនាយ ហុងដា ត្រូវបានជនសង្ស័យ(ជាកូនបង្កើតរបស់នាយហុងដា) ធ្វើសកម្មភាពយក ខ្សែឆ្នាំងអ៊ុតរឹតកសម្លាប់ បង្កឲ្យមានការភ្ញាក់ផ្អើលនៅវេលាម៉ោង១១ និង៤១នាទីថ្ងៃត្រង់ទី១១ ខែឧសភា ឆ្នាំ២០១៧ ស្ថិតនៅចំណុចបន្ទប់គ្មានលេខ ខុនដូជាន់ទី៥ ភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ។

ពាក់ពន្ធ័នឹងសំណុំរឿងឃាតកម្មនេះដែរ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានឲ្យដឹងថា សពមានឈ្មោះ ស៊ឹម ចន្ធី ហៅស្រីអូន ភេទស្រី អាយុ១៨ឆ្នាំ ជាប្រពន្ធទី២របស់នាយហុងដា តារាកំប្លែងល្បីល្បាញម្នាក់នៅក្នុងប្រទេសកម្ពុជា មុខរបរនៅផ្ទះ ស្នាក់នៅកន្លែងកើតហេតុខាងលើ ដោយមានកូនស្រីអាយុ៦ខែជាចំណងស្នេហ៍រវាងអ្នកទាំង២។

លោកអធិការបន្តថា បន្ទាប់ទទួលព័ត៌មាននេះភ្លាម កម្លាំងជំនាញបានចុះដល់កន្លែងកើត បានឲ្យដឹងថាស្ត្រីរងគ្រោះ ត្រូវជនមិនស្គាល់មុខ យកខ្សែឆ្នាំងអ៊ុត រឹតកបណ្តាលឲ្យ ស្លាប់រួចរុំជាមួយភួយក្រឡាការ៉ូ ពណ៌ផ្កាឈូក អូសទៅដាក់ក្នុងបន្ទប់ទឹក។ បន្ទាប់មក សមត្ថកិច្ចបានបើកការស្រាវជ្រាវយ៉ាងយកចិត្តទុកដាក់ ពីកម្លាំងជំនាញ និងបានឆែកមើលកាមេរ៉ា សុវត្ថិភាពរបស់ខុនដូ រហូតឈានទៅដល់ការកំណត់មុខសញ្ញាបាន គឺជាកូនបង្កើតរបស់លោកហុងដា(ដែលជាកូនប្រពន្ធមុន) ហើយករណីនេះគឺជាករណីឃាតកម្ម កូនបង្កើត សម្លាប់ម្តាយចុងខ្លួនឯង តែមិនដឹងមូលហេតុអ្វីនោះទេ ដោយកម្លាំងកំពុងធ្វើការស្រាវជ្រាវ។

តែបើយោងតាមអ្នកមើលការខុសត្រូវនៅក្នុងខុនដូរខាងលើ បានឲ្យដឹងកាលពីម្សិលមិញកូនដើមរបស់ជនរងគ្រោះដែលគេស្គាល់ឈ្មោះ អា និច ភេទប្រុស អាយុប្រហែល២០ឆ្នាំ បាននាំសង្សារមកលេងបន្ទប់កើតហេតុ។ ក៏ប៉ុន្តែមិនដឹងមានទំនាស់អ្វីនោះទេ បានជាឈានដល់ករណីឃាតកម្មបែបនេះ។

បច្ចុប្បន្នសមត្ថកិច្ចជំនាញកំពុងស្វែងរកជនសង្ស័យមកសាកសួរនិងផ្តន្ទាទោសតាមផ្លូវច្បាប់ ៕

Update៖ ប្រពន្ធក្រោយនាយហុងដា គឺត្រូវកូនបង្កើត(ជាកូនប្រពន្ធមុន) រឹតកនឹងខ្សែឆ្នាំងអ៊ុត រួចអូសចូលក្នុងបន្ទប់!

ភ្នំពេញ៖ ខណៈពេលនេះ រឿងរ៉ាវរបស់ ប្រពន្ធក្រោយ របស់តារាកំប្លែង ហុងដា ត្រូវបាន មហាជន និង សមត្ថកិច្ច កំពុងតែដុតដៃដុតជើង តាមចាប់ជនដៃដល់។

កាលពីប៉ុន្មាននាទីមុននេះ ទំព័រហ្វេសប៊ុកមួយ បានបង្ហាញពីវីដេអូ នៅក្នុងកាមេរ៉ាសុវត្ថិភាព នៅខុនដូ ដែលឃើញពីសកម្មភាព របស់បុរស២នាក់ ចូលក្នុងបន្ទប់នារីរងគ្រោះ។ មិនតែប៉ុណ្ណោះ ក្នុងចំណោមបុរសទាំងពីរ គឺគេស្គាល់ថា ជាកូនប្រុសបង្កើត របស់នាយហុងដា ថែមទៀតផង៕

ធ្លាយវីដេអូ សកម្មភាពមុនពេលប្រពន្ធក្រោយ ហុងដា ត្រូវបានគេសម្លាប់ (មានវីដេអូ)

រាជធានីភ្នំពញ៖ សេចក្តីរាយការណ៍បន្តឱ្យដឹង ទាក់ទិនការស្លាប់នារីម្នាក់ ដែលគេស្គាល់ថា ជាប្រពន្ធក្រោយរបស់តារាកំប្លែង ហុង ដា ត្រូវបានឪពុកបង្កើតនារីរងគ្រោះអះអាងនារសៀលថ្ងៃទី១១ ឧសភា ថា កូនស្រីដែលស្លាប់នេះ មានឈ្មោះស៊ឹម ចាន់ធី អាយុ១៨ឆ្នាំ មានទីលំនៅក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ។

ប្រភពបន្តថា កូនស្រីគាត់ (នារីដែលស្លាប់) បានស្រឡាញ់គ្នាជាមួយហុង ដា ដោយពួកគេបាននាំគ្នាមកទិញខុនដូ ស្ថិតនៅភូមិតាឡី នេះ (កន្លែងកើតហេតុ) ស្នាក់នៅជាមួយគ្នា។ ថ្ងៃនេះដែរ ហុងដា គឺមិនបាននៅជាមួយកូនស្រីគាត់ទេ ដោយជាប់រវល់ទៅសម្តែងកន្លែងនៅឯខេត្តបន្ទាយមានជ័យ។

ទោះបីជាយ៉ាងណា ខណៈនេះ សមត្ថកិច្ចនៅមិនទាន់សន្និដ្ឋានបានថា តើជាករណីអ្វីពិតប្រាកដឡើយ ចំពោះការស្លាប់នារីងគ្រោះ ដោយកម្លាំងកំពុងដុតដៃជើងស្រាវជ្រាវយ៉ាងក្តៅបំផុត។ ក្នុងនោះសមត្ថកិច្ចក៏មិនអនុញ្ញាតឱ្យអ្នកណាម្នាក់ ចូលទៅជិតសាកសពដែរ ដោយកំពុងពិនិត្យ និងធ្វើសល្យវិច័យបន្តទៀត៕

ប្រពន្ធក្រោយនាយ ហុង ដា បានស្លាប់ក្នុងខុនដូ សង្ស័យជាអំពើឃាតកម្ម

Wednesday, May 10, 2017

ភ្នំពេញ៖ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានប្រាប់បណ្តាញព័ត៌មាន Fresh News ឱ្យដឹងនៅយប់ជ្រៅថ្ងៃទី០៩ ខែឧសភា ឆ្នាំ២០១៧នេះថា ទាហានមួកខៀវកម្ពុជា៣រូប ដែលបាត់ខ្លួនក្រោយហេតុការណ៍បាញ់ប្រហារ ដោយក្រុមឧទ្ទាម នៅប្រទេសអាហ្រ្វិកកណ្តាល នាយប់ថ្ងៃទី០៨ ខែឧសភា ឆ្នាំ២០១៧នោះ ពេលនេះបានស្លាប់ហើយ។ សាកសពរបស់ពួកគាត់ត្រូវបានរកឃើញ នៅថ្ងៃទី០៩ ខែឧសភានេះ នៅប្រមាណ២គីឡូម៉ែត្រពីកន្លែងកើតហេតុតែម្តង។ ទាហានកម្ពុជាស្លាប់សរុបទាំងអស់ចំនួន៤នាក់។

នាយឧត្តមសេនីយ៍ ឈុំ សុជាតិ បានបញ្ជាក់យ៉ាងដូច្នេះថា «កម្លាំងកម្ពុជា០៣នាក់ដែលបានបាត់ខ្លួន ក្នុងសាធារណរដ្ឋអាហ្វ្រិកកណ្តាល ត្រូវបានរកឃើញស្លាប់ទាំងអស់ ក្នុងចំងាយ ២គម ពីកន្លែងកើតហេតុ។ សពទាំងបីនេះត្រូវបានអន្តរាគមន៍ដោយក្រុមគ្រូព្រះវិហារដែលនៅក្បែរនោះ។ សពទាំងបីកំពុងតំកល់នៅតំបន់ Bangassou រង់ចាំដឹកតាមឧទ្ធម្ភាគចក្ររបស់ អ.ស.ប មកទីក្រុង Bangui នាព្រឹកស្អែក»។

ក្រសួងការពារជាតិ បានសម្តែងការសោកស្តាយយ៉ាងពន់ពេក ចំពោះការបាត់បង់ទាហានមួកខៀវរបស់កម្ពុជា ព្រមទាំងចូលរួមរំលែកទុក្ខចំពោះការពលីជីវិតប្រកបដោយកិត្តិយសថ្លៃថ្នូរ និងវីរភាពដ៏អង់អាចក្លាហាននៃកុលបុត្រកម្ពុជា ដែលបានលះបង់ជីវិតក្នុងការបំពេញបេសកកម្មមនុស្សធម៌អន្តរជាតិ ក្រោមឆ័ត្រ អ.ស.ប នៅសាធារណរដ្ឋអាហ្រ្វិចកណ្តាល នាពេលនេះ។

បើតាមសេចក្តីប្រកាសក្រសួងការពារជាតិ បានឱ្យដឹងថា ទាហានមួកខៀវកម្ពុជា ៣រូប ដែលបានបាត់ខ្លួន ហើយទើបនឹងដឹងថាទទួលមរណភាពនេះរួមមាន៖ លោកអនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យគុណភាព, លោកពលបាលឯក មុំ តុលា (ព្រិន្ទបាលទោ) ជំនួយការបើកបរអ៊ិស្ការវ៉ាទ័រ និង លោកអនុសេនីយ៍ត្រី ម៉ៅ អេង (អនុសេនីយ៍ឯក) បុគ្គលិកពេទ្យ។

សូមបញ្ជាក់ថា នៅយប់រំលងអាធ្រាត្រ ថ្ងៃទី០៨ ខែឧសភា ឆ្នាំ២០១៧នេះ មានការវាយប្រហារ ដោយក្រុមឧទ្ទាម ទៅលើក្បួនយុទ្ធដំណើររបស់កម្លាំង Minusca របស់អង្គការសហប្រជាជាតិ បណ្តាលឱ្យកម្លាំងកម្ពុជាម្នាក់ស្លាប់ភ្លាមៗ ម្នាក់រងរបួស និងបាត់ខ្លួន៣នាក់។ ប៉ុន្តែពេលនេះអ្នកដែលបាត់ខ្លួនទាំងនោះបានស្លាប់ហើយ។ ដោយចំនួនអ្នកស្លាប់ទាំងអស់៤នាក់ (មុនម្នាក់ ក្រោយ៣នាក់)។

នៅព្រឹកមិញនេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ក៏បានអំពាវនាវឱ្យអង្គការសហប្រជាជាតិ យកចិត្តទុកដាក់ទទួលខុសត្រូវ ឱ្យបានខ្ពស់ចំពោះហេតុការណ៍ខាងលើផងដែរ៕

ប្រភព៖ គេហទំព័រ Freshnews

ទាហានមួកខៀវកម្ពុជា៣នាក់ ដែលបាត់ខ្លួននៅប្រទេសអាហ្រ្វិកកណ្តាល ពេលនេះបានស្លាប់ហើយ

Tuesday, May 9, 2017

ដំណឹងអន្តរជាតិ៖ ទីភ្នាក់ងាររបស់ថៃ នៅថ្ងៃទី០៩ ឧសភា នេះបានផ្សាយថា មានករណីបំផ្ទុះចំនួន២គ្រាប់ ស្ថិតនៅផ្សារទំនើប «BigC» ក្នុងខេត្តប៉ាតានី ភាគខាងត្បូងប្រទេសថៃ បង្កឱ្យមានមនុស្សរងរបួស ៣៥នាក់ និងរថយន្តប្រហែល១០០គ្រឿងទទួលរងការខូចខាត ។

តាមការត្រួតពិនិត្យរបស់ប៉ូលិសនៅកន្លែងកើតហេតុដំបូងឃើញថា មានមួយក្នុងចំណោមការផ្ទុះទាំង២លើកនេះ អាចជាការបង្កៃគ្រាប់នៅក្នុងរថយន្តរបស់ក្រុមភេរវករ។

បច្ចុប្បន្ន សមត្ថកិច្ចកំពុងធ្វើការស៊ើបអង្កេតបន្ត ដោយយកចិត្តទុកដាក់បំផុត។

នោះទៀត! បំផ្ទុះគ្រាប់បែក២លើកនៅផ្សារ «Big C» ប្រទេសថៃ

ដំណឹងជាតិ៖ បើតាមឯកឧត្តម ឡុង ឌីម៉ង់ ឯកអគ្គរាជទូកកម្ពុជាប្រចាំប្រទេសកូរ៉េ បានឲ្យដឹងថា អនុសេនីយ៍ឯកដែលសម្តេចតេជោថ្លែងកាលពីព្រឹកមិញ គឺត្រូវបានក្រុមឧទ្ទាមបានសម្លាប់ ក្នុងពេលបំពេញបេសកកម្មក្នុងក្របខ័ណ្ឌថែរក្សាសន្តិភាពរបស់អង្គការសហប្រជាជាតិ នៅប្រទេសអាហ្រិកកណ្តាលជាមួយកងកម្លាំងម៉ារ៉ុក។

សូមបញ្ជាក់ថា ក្នុងពិធីសម្ពោធសាលាខេត្តត្បូងឃ្មុំ នៅព្រឹកថ្ងៃអង្គារ ទី០៩ ខែឧសភា នេះ សម្ដេចនាយករដ្ឋមន្ត្រី បានប្រកាសចូលរួមសោកស្តាយនិងសម្ដែងមរណទុក្ខយ៉ាងក្រៀមក្រំ ចំពោះការស្លាប់កងកម្លាំងរក្សាសន្តិភាព មួកខៀវកម្ពុជា ម្នាក់ និង៣នាក់ទៀតកំពុងបាត់ខ្លួន ដោយសារការវាយប្រហារមួយដោយក្រុមពួកឧទ្ទាម កាលពីយប់មិញនៅប្រទេសអាហ្វ្រិកកណ្តាល។

ក្នុងពិធីនេះដដែរសម្តេចតេជោ ក៏បានបញ្ជាក់ឲ្យដឹងដែរថា កងកម្លាំងមួកខៀវកម្ពុជាដែលស្លាប់នោះ ជាអនុសេនីយ៍ឯក ធន សំ មានស្រុកកំណើតនៅខេត្តសៀមរាប។ ដោយឡែក៣នាក់ទៀត មិនបានកំណត់អត្តសញ្ញាណនៅឡើយ កងកម្លាំងរបស់កម្ពុជានិងកងកម្លាំង UN បានប្រើប្រាស់ឧទ្ធម្ភាគចក្រ៣គ្រឿង កំពុងស្វែងរក។

សម្ដេចបន្ថែមថា ប្រសិនកងកម្លាំងមួកខៀវកម្ពុជា ត្រូវក្រុមឧទ្ទាមចាប់ធ្វើជាចំណាត់ខ្មាំង ដើម្បីជាថ្នូរនឹងអ្វីមួយនោះ សម្ដេចសូមស្នើឲ្យ UN ដែលជាអ្នកធានាខុសត្រូវនោះ ត្រូវតែធានាអាយុជីវិតទាហានកម្ពុជាដែលបានបាត់ខ្លួននេះ ក៏ដូចជាទាហានម៉ារ៉ុកដែលបានបាត់ខ្លួនម្នាក់នោះផងដែរ ព្រោះថា គោលដៅវាយប្រហាររបស់ក្រុមឧទ្ទាមនេះ ធ្វើឡើងដើម្បីរំដោះចំណាត់ខ្មាំងរបស់ពួកគេដែលនៅជិតតំបន់របស់កងកម្លាំងមួកខៀវកម្ពុជានិងម៉ារ៉ុក។

គួរម្លឹកផងដែថា ការវាយប្រហាររបស់ក្រុមឧទ្ទាមនៅលើទឹកដីអាហ្វ្រិកកណ្តាលនេះ ជាព័ត៌មានបឋម បានឲ្យដឹងថា វាបានធ្វើឲ្យកម្លាំងមួយខៀវកម្ពុជា ម្នាក់បានស្លាប់ និង៣នាក់ខ្លួន ព្រមទាំងកងទ័ពម៉ារ៉ុករងរបួស៥នាក់និងបាត់ខ្លួនម្នាក់៕

រូបតំណាង

គួរឲរន្ធត់ណាស់..! កងកម្លាំងមួកខៀវម្នាក់ ត្រូវក្រុមឧទ្ទាមសម្លាប់ ខណៈ៣នាក់ទៀតកំពុងបាត់ខ្លួន

Saturday, May 6, 2017

ដំណឹងអន្តរជាតិ៖ គេហទំព័រសារព័ត៌មាន VNEXPRESS បានផ្សាយកាលពីថ្ងៃទី០១ ខែតុលា ឆ្នាំ២០១៦កន្លងទៅថ្មីៗនេះឲ្យដឹងថា ក្រសួងកសិកម្ម និងអភិវឌ្ឍន៍ជនបទវៀតណាម បានសម្រេចផ្អាកជាបណ្ដោះអាសន្ន នូវការនាំចេញអង្កររបស់ខ្លួន ទៅកាន់ទីផ្សារសហរដ្ឋអាមេរិក ដែលការសម្រេចដូច្នេះ កើតឡើងក្រោយពីរដ្ឋបាលអាហារ និងឱសថសហរដ្ឋអាមេរិក (FDA) បានពិនិត្យរកឃើញថា អង្ករវៀតណាមមានប្រើប្រាស់សារធាតុគីមី ហួសកម្រិតកំណត់ចំនួន ៨ប្រភេទ ជាពិសេសបរិមាណសារធាតុ ថ្នាំសម្លាប់សត្វល្អិតនៅក្នុងអង្ករបណ្ដាលឲ្យប៉ះពាល់ដល់សុខភាព ។

សមាគមចំណីអាហាររបស់វៀតណាមបានបញ្ជាក់ឲ្យដឹងថា សហរដ្ឋអាមេរិកដែលបញ្ជាទិញអង្ករ ពីប្រទេសវៀតណាម បានសម្រេចច្រានចោលការបញ្ជាទិញអង្ករ វៀតណាម ចំនួន ៩៤កុងតឺន័រ ស្មើនឹងប្រមាណ ១៧០០ តោន ។

យោងតាមទិន្នន័យរបស់អាជ្ញាធរគយវៀតណាម បានបង្ហាញឲ្យដឹងថា រយៈពេល០៨ខែក្នុងឆ្នាំ២០១៦ នេះ វៀតណាមបាននាំចេញអង្ករចំនួន ២២០៨៤តោន ទៅកាន់ទីផ្សារសហរដ្ឋអាមេរិក៕

ប្រភព៖ គេហទំព័រ ខ្មែរស្ថាបនា

អង្ករវៀតណាមជិត ២០០០តោន ត្រូវបានអាមេរិករកឃើញ មានប្រើសារធាតុគីមីហួសកម្រិតកំណត់

(វ៉ាស៊ីនតោន)៖ សហរដ្ឋអាមេរិកកំពុងតែធ្វើការតាមដានយ៉ាងដិតដល់ ទៅលើកិច្ចសហការដ៏សម្ងាត់រវាងយោធាកូរ៉េខាងជើង និងអ៊ីរ៉ង់ ដោយសារតែប្រទេសអ៊ីរ៉ង់បានព្យាយាមធ្វើតេស្ត បាញ់គ្រាប់មីស៊ីលចេញពីនាវាមុជទឹកកាលពីដើមសប្តាហ៍នេះ ដែលអាចជាសញ្ញាបង្ហាញថា ទីក្រុងតេហេរ៉ង់ពិតជាទទួលបានការជួយគាំទ្រពីរដ្ឋណាមួយជាក់ជាមិនខាន។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានយ៉ុនហាប់ នាព្រឹកថ្ងៃសៅរ៍ ទី០៦ ខែឧសភា ឆ្នាំ២០១៧។

ការបាញ់មីស៊ីលពីនាវាមុជទឹកខ្នាតមធ្យម កាលពីថ្ងៃអង្គារ ដែលប្រព្រឹត្តទៅដោយកងទ័ពជើងទឹកប្រទេសអ៊ីរ៉ង់ ត្រូវបានមន្ត្រីក្រសួងការពារជាតិអាមេរិកបង្ហាញភស្តុជាបឋមថា រដ្ឋអ៊ីស្លាមមួយនេះពិតបានលួចលាក់មានសម្ព័ន្ធភាពជាមួយនឹងកូរ៉េខាងជើងជាក់ជាមិនខាន ដោយសារតែនាវាមុជទឹកខាងលើនេះ គឺមានលក្ខណៈនៃការធ្វើប្រតិបត្តិការ និងផលិតចេញមក ទៅតាមអ្វីដែលកូរ៉េខាងជើងបានធ្វើរួចហើយ។

របាយការណ៍ដែលត្រូវបានចេញផ្សាយដោយ Fox News ខាងលើនេះ បានបញ្ជាក់យ៉ាងដូច្នេះថា «នាវាមុជទឹកដែលប្រទេសអ៊ីរ៉ង់បានប្រើប្រាស់ គឺជាប្រភេទតែមួយនៃនាវាមុជទឹក ដែលបានបាញ់ពន្លិចនាវាចម្បាំងកូរ៉េខាងត្បូងកាលពីឆ្នាំ២០១០ ដែលបានសម្លាប់កងយោធា ៤៦នាក់»។ មន្ត្រីការពារជាតិអាមេរិកបានអះអាងថា ប្រទេសអ៊ីរ៉ង់បានព្យាយាមបាញ់គ្រាប់មីស៊ីល Jask-2 cruise ចេញពីនាវាមុជទឹកខាងលើនេះ ដែលវាជារឿងមិនអាចមើលរំលងបានថា មានជាប់ពាក់ព័ន្ធនឹងកូរ៉េខាងជើង ដូចដែលកាលពីដើមឆ្នាំ២០១៧នេះ អ៊ីរ៉ង់បានធ្វើតេស្តមីស៊ីលផ្លោង នោះក៏ដូចនឹងអ្វីដែលកូរ៉េខាងជើងបានផលិតផងដែរ៕

ប្រភព៖ គេហទំព័រ Freshnews

ពេលនេះអាមេរិក «កំពុងតាមដានយោធាអ៊ីរ៉ង់ និងកូរ៉េខាងជើង ដែលលួចផ្តល់បច្ចេកវិទ្យា នាវាមុជទឹក-មីស៊ីល ឲ្យគ្នាដោយសម្ងាត់!»

Friday, May 5, 2017

ដំណឹងអន្តរជាតិ៖ កងទ័ពឥណ្ឌានៅថ្ងៃព្រហស្បតិ៍នេះ បានបាញ់សាកល្បង និងទទួលជោគជ័យធំធេងលើមីស៊ីលផ្លោងប្រភេទ Agni-II ដែលអាចបំពាក់ក្បាលគ្រាប់នុយក្លេអ៊ែរ ហើយគ្រាប់មីស៊ីលនេះត្រូវបានបាញ់ចេញពីកោះ wheelerនៃតំបន់ឆ្នេរនៃរដ្ឋ Odisha។ នេះបើតាមការផ្សាយនៃវិទ្យុ All India Radio (AIR) ដកស្រង់ដោយទីភ្នាក់ងារសារព័ត៌មានចិន ស៊ិនហួរ នៅរសៀលថ្ងៃព្រហស្បតិ៍ ទី០៤ ខែឧសភា ឆ្នាំ២០១៧។

យោងតាមវិទ្យុ All India Radio មីស៊ីល Agni-II បានវាយប្រហារចំគោលដៅ នៅចម្ងាយដល់ទៅជាង ២,០០០គីឡូមែត្រ ដែលនេះគឺបង្ហាញពីភាពកាន់តែរីកចំរើនទៅមុខ នៃប្រព័ន្ធអភិវឌ្ឍន៍សព្វាវុធរបស់មហាយក្សឥណ្ឌា ក៏ដូចជាសមត្ថភាពមីស៊ីលរយៈចំងាយមធ្យម ដែលបំពាក់ក្បាលគ្រាប់នុយក្លេអ៊ែរ និងវាយប្រហារលើគោលដៅរបស់សត្រូវ ទំាងនៅលើដី និងនៅលើផ្ទៃទឹក។

គួរបញ្ជាក់ថា គ្រាប់មីស៊ីល Agni-II អាចនាំក្បាលគ្រាប់នុយក្លេអ៊ែរទម្ងន់ ១,០០០គីឡូក្រាម និងត្រូវបានអភិវឌ្ឍន៍ដោយអង្គភាពស្រាវជ្រាវ និងអភិវឌ្ឍន៍វិស័យការពារជាតិឥណ្ឌា។ ការបាញ់នេះបានកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីកងកម្លាំងយោធានៃប្រទេសឥណ្ឌា បានធ្វើការបាញ់សាកល្បងគ្រាប់មីស៊ីលជាប្រភេទ Cruise Missile មានឈ្មោះថា Brahmos ដោយជោគជ័យ ដែលជាជំនាន់ថ្មីបំផុតទើបតែត្រូវបានបង្កើនសមត្ថភាព យ៉ាងទំនើបលើសមុនៗ៕

ឥណ្ឌា ធ្វើតេស្តមីស៊ីលអាចបំពាក់ ក្បាលគ្រាប់នុយក្លេអ៊ែរទម្ងន់ ១,០០០គីឡូក្រាមបានជោគជ័យ

Tuesday, May 2, 2017

ថ្មីបំផុត ចាប់ពីថ្ងៃនេះទៅបងប្អូនប្រជាពលរដ្ឋ ដែលព្រួយបារម្ភមិនបានទៅញ៉ាំការមិត្តភក្ដិ ឬម្ចាស់ដើមការខ្ជិលកត់ចំណងដៃច្រើន ឥឡូវនេះលែងពិបាកទៀតហើយ ព្រោះមានសេវាកម្ម អេស៊ីលីដាយូនីធី ទាន់ចិត្ត ដែលបង្កើតដោយធនាគារ អេស៊ីលីដា ក្នុងនោះការចងដៃក្នុងពិធីមង្គលការ ម្ចាស់ដើមការគ្រាន់ចុះឈ្មោះប្រើប្រាស់គណនីទាន់ចិត្ត និងស្នើឲ្យធនាគារបោះពុម្ពកូដ ដើម្បីដាក់ទូទាត់ គឺជាការស្រេច ។ នេះបើតាមការឱ្យដឹងពីមន្រ្ដីជាន់ខ្ពស់មួយរូបរបស់ធនាគារ អេស៊ីលីដា ប្រាប់មកកាន់ Sabay។

តាមប្រភពដដែលបានប្រាប់ទៀតថា ភ្ញៀវកិត្តិយសដែលមានគណនីទាន់ចិត្ត អាចចងដៃការដោយផ្ទេរទៅកូដនោះ ។ បន្ទាប់មកម្ចាស់ដើមការអាចដកប្រាក់នៅតាមការិយាល័យធនាគារណាមួយ និងសុំរបាយការណ៍ពីធនាគារ អំពីអ្នកបានផ្ទេរឲ្យ។

គួរបញ្ជាក់ផងដែរថា សេវាកម្ម អេស៊ីលីដាយូនីធី ទាន់ចិត្ត នេះបង្កើតដោយធនាគារអេស៊ីលីដា ដោយផ្ទាល់ ហើយរំពឹងថានឹងទទួលបានការចាប់អារម្មណ៍ និងពេញនិយម ពីសំណាក់អតិថិជន និងសាធារណៈជនទូទៅ ព្រោះវាជាឧបករណ៍ទូទាត់ សន្សំប្រាក់ និងផ្ទេរប្រាក់ ឆាប់រហ័ស និងមានសេវាធនាគារជាច្រើនភ្ជាប់មកជាមួយ ។

សេវានេះមានភាពងាយស្រួលក្នុងការចុះឈ្មោះប្រើប្រាស់ ដោយបងប្អូនប្រជាពលរដ្ឋ download program ACLEDA Unity ToanChet ពី AppStore or Play Store ហើយធ្វើតាមការណែនាំ ឬទៅកាន់ការិយាល័យធនាគារដើម្បីសុំជំនួយ ។ បងប្អូនអាចធ្វើផ្ទេរប្រាក់ ឱ្យគ្នាទៅវិញទៅមក តាមលេខទូរសព្ទ ឬគណនី ដោយខ្លួនឯង គ្រប់ទីកន្លែង ដោយមិនមានថ្លៃសេវា។ ងាយស្រួលដល់អ្នកមានរបរលក់រាយ លក់ដុំ ដែលត្រូវទូទាត់ និងអ្នកផ្ទេរទៅតាមបណ្ដាខេត្តនានា៕

ប្រភព៖ គេហទំព័រ សប្បាយ

ថ្មីបំផុត! សេវាចងដៃការតាមប្រព័ន្ធអេឡិចត្រូនិក ដំបូងគេនៅកម្ពុជា

រាជធានីភ្នំពេញ៖ កូរ៉េខាងជើង មានបំណងចង់ស្នើសុំឲ្យកម្ពុជា ដែលជាសមាជិករបស់អាស៊ាន និងជាសមាជិកអង្គការសហប្រជាជាតិ ជួយចូលរួមដោះស្រាយបញ្ហាជម្លោះនៅឧបទ្ធីបកូរ៉េដោយសន្តិវិធី ដែលកំពុងមានស្ថានភាពតានតឹងផ្នែកយោធាជាមួយសហរដ្ឋអាមេរិក នេះបើយោងតាមលោក Jang Yun Gon ឯកអគ្គរដ្ឋទូតកូរ៉េខាងជើង ប្រចាំនៅទីក្រុងភ្នំពេញ ធ្វើកិច្ចសម្ភាសន៍ផ្តាច់មុខជាមួយកាសែតភាសាអង់គ្លេស Khmer Times នាចុងសប្តាហ៍ កន្លងទៅនេះ។

នៅក្នុងបទសម្ភាសនោះ លោក Jang Yun Gon ឯកអគ្គរដ្ឋទូតរបស់កូរ៉េខាងជើងប្រចាំនៅកម្ពុជា បានឲ្យដឹងថា ប្រទេសកម្ពុជាជាសមាជិកដ៏សំខាន់ របស់អាស៊ាន និងបានដើរតួនាទីយ៉ាងសំខាន់ក្នុងកិច្ចការទូតនៅលើ ឆាកអន្តរជាតិតាមរយៈអង្គការសហប្រជាជាតិ។

លោក Jang បានថ្លែងឲ្យដឹងយ៉ាងដូច្នេះថា៖ «សាធារណរដ្ឋប្រជាមានិតប្រជាធិបតេយ្យកូរ៉េ [ប្រទេសកូរ៉េខាងជើង] និងកម្ពុជាមានទំនាក់ទំនងដ៏ល្អ និងប្រវត្តិនៃការគាំទ្រគ្នាទៅវិញទៅមក ដែលមិនមែនត្រឹមតែនៅក្នុងទំនាក់ទំនងទ្វេភាគីប៉ុណ្ណោះទេ ប៉ុន្តែថែមទំនាក់ទំនងអន្តរជាតិផងដែរ»។

លោកបានបន្ថែមឲ្យដឹងថា «ខ្ញុំមានទំនុកចិត្តថា ប្រទេសកម្ពុជាដែលជាមិត្តភក្តិពិតជាយល់ពីភាពតានតឹង នាពេលបច្ចុប្បន្នអំពីឧបទ្វីបកូរ៉េ ហើយនឹងបង្ហាញពីសាមគ្គីភាពតាមរយៈអាស៊ានដើម្បីជួយស្វែងរកដំណោះស្រាយការទូត ក្នុងការរក្សាស្ថិរភាពនិងសន្តិភាពនៅក្នុងប្រទេសរបស់យើង»។

លោក Jang Yun Gon បានបន្ថែមទៀតថា «នាយករដ្ឋមន្រ្តី នៃព្រះរាជាណាចក្រកម្ពុជា បានស្នើឱ្យក្រុមប្រឹក្សាសន្តិសុខអង្គការ សហប្រជាជាតិដើម្បី អនុម័តដំណោះស្រាយដោយប្រុងប្រយ័ត្នសម្រាប់សន្តិសុខនៅលើឧបទ្វីបកូរ៉េ និងភាគីពាក់ព័ន្ធទាំងអស់ដោយគួរតែដោះស្រាយ បញ្ហានេះដោយសន្តិវិធី»។ លោកបានបន្ថែមថា «យើងបានឱ្យតម្លៃទៅលើទំនាក់ទំនងជាមួយប្រទេសកម្ពុជា ហើយយើងចង់រក្សា និងពង្រឹងទំនាក់ទំនងមួយនេះឲ្យកាន់តែខ្លាំង បន្ថែមទៀត។ ទំនាក់ទំនងនេះនឹងត្រូវផ្អែកលើផលប្រយោជន៍ របស់ប្រជាជននៅក្នុងប្រទេសទាំងពីរនេះ»។

ការអំពាវនាវរបស់របស់លោក Jang Yun Gon បានធ្វើឡើងមួយថ្ងៃ បន្ទាប់ពីរដ្ឋមន្រ្តីការបរទេសកូរ៉េខាងជើង លោក Ri Yong-Ho បានផ្ញើលិខិតផ្លូវការ មួយទៅកាន់អគ្គលេខាធិការអាស៊ាន លោក Le Luong Minh មុនពេលដែលកិច្ចប្រជុំកំពូលអាស៊ាននៅទីក្រុងម៉ានីល ជម្រុញឱ្យបណ្តាប្រទេសអាស៊ាន មានការគាំទ្រក្នុងការស្វែងរកដំណោះស្រាយ ចំពោះភាពតានតឹងនៅលើឧបទ្វីបកូរ៉េនាពេលបច្ចុប្បន្ន។

យោងតាមមន្រ្តីការទូតប្រចាំនៅកម្ពុជាដដែលរូបនេះបានឲ្យដឹងថា នេះគឺជាលើកដំបូងហើយដែលកូរ៉េខាងជើង បានសរសេរលិខិតផ្លូវការទៅកាន់អាស៊ាន ដើម្បីស្វែងរកជំនួយការទូតពីប្រទេសជាសមាជិកចំនួន១០។

តាមរយៈលិខិតដែលផ្ញើទៅកាន់តំបន់អាស៊ាន ដែលសេចក្ដីចម្លងមួយច្បាប់ បានទទួលដោយ AFP បានឲ្យដឹងថា លោក Ri ក៏បានព្រមានផងដែរ ពីស្ថានភាពនៅឧបទ្វីបកូរ៉េតាមរយៈការលើកឡើងថា «វាកំពុងតែឈានដល់ចំនុចចាប់ផ្ដើមនៃសង្រ្គាម» ដោយសារតែសកម្មភាពរបស់សហរដ្ឋអាមេរិក។

ឯកអគ្គរដ្ឋទូតកូរ៉េខាងជើងប្រចាំប្រទេសកម្ពុជា លោក Jang បានបន្តឲ្យដឹងថា «កូរ៉េខាងជើងមានសមត្ថភាពខ្ពស់ដើម្បីតបតទៅនឹងការធ្វើសកម្មភាព យោធាណាមួយពីសហរដ្ឋអាមេរិកតាមរយះនុយក្លេអ៊ែរ»។

លោក Jang បាននិយាយថា «កូរ៉េខាងជើងគឺជារដ្ឋសង្គមនិយមមួយដែលស្រឡាញ់សន្តិភាព។ ប៉ុន្តែពួកគេមិនមានការភ័យខ្លាចសង្គ្រាម ឬក៏ចង់ជៀសវាងពីសង្រ្គាមនោះទេ។ វាជាឆន្ទៈដ៏មុតមាំមួយរបស់កូរ៉េខាងជើងដើម្បីឆ្ពោះទៅរកទីបញ្ចប់ប្រសិនបើអាមេរិក នៅតែមិនផ្លាស់ប្តូរដំណាក់ កាលប្រយុទ្ធរបស់ខ្លួន, ប្រសិនបើសហរដ្ឋអាមេរិកហ៊ានជ្រើសរើសយកការវាយប្រហារ កូរ៉េខាងជើងបានត្រៀមខ្លួនរួចជាស្រេចដើម្បីតបតទៅនឹង របៀបនៃសង្រ្គាមណាមួយដែលសហរដ្ឋអាមេរិកចង់បាន»។

គួរបញ្ជាក់ថា ដោយសារតែភាពតានតឹងផ្នែកសន្តិសុខ សហរដ្ឋអាមេរិកបានបញ្ជូនក្រុមនាវាដឹកយន្តហោះចម្បាំង USS Carl Vinson ដើរដោយថាមពលនុយក្លេអ៊ែរ រួមទាំងនាវាមុជទឹក USS Michigan ដែលបំពាក់ដោយគ្រាប់មីស៊ីលប្រដេញ និងដើរដោយថាមពលនុយក្លេអ៊ែរមកកាន់ដែនទឹកក្បែរឧបទ្វីបកូរ៉េ។ ប៉ុន្តែទោះបីជាភាពតានតឹងនៅក្នុងតំបន់ មានការកើនឡើងឥតឈប់ឈរយ៉ាងណាក្តី ក៏កូរ៉េខាងជើង នៅតែមិនព្រមបង្ហាញភាពចុះញ៉មអ្វីបន្តិចនោះឡើយ ដោយនាថ្ងៃចន្ទនេះប្រទេសកុម្មុយនិស្តមួយនេះបានប្តេជ្ញាថា នឹងបន្តបង្កើនអានុភាពនៃអាវុធនុយក្លេអ៊ែររបស់ខ្លួន នៅក្នុងសន្ទុះយ៉ាងលឿនពេញទំហឹងតែម្តង៕

ប្រភព៖ គេហទំព័រសារព័ត៌មាន Freshnews

កូរ៉េខាងជើង មានបំណងស្នើសុំ សម្តេចនាយករដ្ឋមន្រ្តីកម្ពុជា ជួយដោះស្រាយបញ្ហាជម្លោះជាមួយសហរដ្ឋអាមេរិក នៅឧបទ្ធីបកូរ៉េ

Sunday, April 30, 2017

ដំណឹងអន្តរជាតិ៖ នាវាផ្ទុកយន្តហោះបារាំង មួយគ្រឿងឈ្មោះ Mistral បានទៅដល់កំពង់ផែកោះ សាសេបូ (Sasebo) របស់ប្រទេសជប៉ុន នៅថ្ងៃសៅរ៍នេះ ដើម្បីដឹកនាំសមយុទ្ធយោធាដែលមានកងទ័ព បារាំង អង់គ្លេស អាមេរិក និងជប៉ុន បន្តរហូតដល់ថ្ងៃទី៥ ខែឧសភា។

នាវាផ្ទុកយន្តហោះ Mistral មានសមត្ថភាពអាចផ្ទុកឧទ្ធម្ភាគចក្រ ៣៥គ្រឿង មាននាវាសណ្ដោង ៤គ្រឿង ព្រមទាំងទាហានរាប់រយនាក់ ហើយអាចវាយប្រហារគោលដៅទាំងក្នុងទឹក និងលើគោក។ សមយុទ្ធយោធារបស់កងទ័ពនៃប្រទេសទាំង ៤ ធ្វើឡើងស្របពេលដែលភាពតានតឹងនៅលើឧបទ្វីបកូរ៉េ ស្ថិតក្នុងតំណាក់កាលមួយអាក្រក់បំផុត មិនធ្លាប់មានតាំងពីការបញ្ចប់ទៅនៃសង្គ្រាមកូរ៉េឆ្នាំ១៩៥៣ ដោយសារការសាកល្បងគ្រាប់បែកនុយក្លេអ៊ែររហូតដល់ ៥លើក របស់ កូរ៉េខាងជើង និងការសាកល្បងមីស៊ីលទំនើបជាច្រើនលើកទៀត។

ក្រៅពីបញ្ហាឧបទ្វីបកូរ៉េ មហាអំណាចបស្ចិមប្រទេសក៏មានបំណងពង្រឹងអំណាចយោធារបស់ខ្លួនផងដែរ ក្នុងមហាសមុទ្រប៉ាស៊ីហ្វិក ក្រោយពីប្រទេសចិន បង្កើនអំណាចយោធាយ៉ាងខ្លាំងក្នុងតំបន់សមុទ្រចិនខាងត្បូង តាមរយៈការសាងសង់កោះសិប្បនិម្មិត និងបង្កើតប៉មត្រួតពិនិត្យនៅលើប្រជុំកោះដែលមានទំនាស់៕

ឧបទ្វីបកូរ៉េកាន់តែឡើងកម្តៅហើយ! បារាំង បញ្ជូននាវាផ្ទុកយន្តហោះទៅក្បែរកូរ៉េហើយ

ដំណឹងអន្តរជាតិ៖ កាលពីពេលថ្មីនេះនៅក្នុងបណ្តាញសង្គមចិន បានផ្ទុះការចាប់អារម្មណ៍ទៅព័ត៌មានមួយ ដែលថាមានឪពុកបង្កើតម្នាក់បានវាយធ្វើបាបកូនស្រីរបស់ខ្លួន ព្រោះតែនាងលួចញ៉ាំម្ហូបរបស់គេ។ ក្រោយការផ្ទុះព័ត៌មាននេះ ក្រុមអ្នកសារព័ត៌មានបានចុះទៅស្វែកព័ត៌មានលំអិត អំពីកូនស្រីរងគ្រោះនោះ។ នៅមុខអ្នកសារព័ត៌មាន ស្រ្តីរងគ្រោះដែលទើបតែមានអាយុ១៦ឆ្នាំបានប្រាប់ថា ឪពុកបង្កើតរបស់នាងតែងតែវាយធ្វើបាបនាងដូចនេះ អស់រយៈពេលជាច្រើនឆ្នាំមកហើយ។

ជាងនេះទៅទៀតនាងបានប្រាប់ថា ឪពុករបស់នាងបានចាប់រំលោភនាងមួយឆ្នាំមកហើយ ពោលគឺចាប់ពីពេលនាងមានអាយុ១៥ឆ្នាំ។ ក្រោយទទួលបានដំណឹងនេះ អាជ្ញារបានបញ្ចូននាងទៅមន្ទីរពេទ្យ ដើម្បីធ្វើការពិនិត្យរាងកាយតែលទ្ធផលបានបង្ហាញថា នាងនៅមានភាពបរិសុទ្ធគ្រាន់តែប្រដាប់ភេទរបស់នាង រងនូវការវាយដំពីសំណាក់ឪពុកចិត្តអាក្រក់របស់នាងដែរ។ យ៉ាងទោះជាយ៉ាងនេះក្តី ឪពុករបស់នាងត្រូវបានចាប់ខ្លួនពីបទប្រើប្រាស់អំពើហិង្សាទៅលើកូនស្រីរបស់ខ្លួន៕

អាសូរណាស់! អាយុទើប១៦ឆ្នាំ ត្រូវឪពុកបង្កើតវាយធ្វើបាប និងចាប់រំលោភជាងមួយឆ្នាំទើបបែកការណ៍

ទីក្រុងម៉ានីល៖ មនុស្សយ៉ាងហោចណាស់១៤នាក់ បានរងរបួសនៅក្នុងការផ្ទុះមួយនៅខាងក្រោយតំបន់ពាណិជ្ជកម្ម នៅតាមបណ្តោយមហាវិថីកេហ្សុន ក្នុងស្រុក Quiapo ប្រទេសហ្វីលីពីន ចំពេលមានការប្រជុំកំពូលរបស់មេដឹកនាំអាស៊ានចំនួន១០រូប ដែលក្នុងនោះមានប្រទេសកម្ពុជាផងដែរ នៅទីក្រុងម៉ានីល នេះបើតាមការចេញផ្សាយព័ត៌មានរបស់ Rappler។

បើយោងតាមមន្ត្រីប៉ូលិសក្នុងតំបន់បានអោយដឹងថា ការផ្ទុះនេះបានកើតឡើងនៅម៉ោងប្រហែល១០និង៤៩នាទីយប់ ថ្ងៃទី២៨ មេសា ២០១៧ នៅចម្ងាយប្រហែល៥គីឡូម៉ែត្រ ពីកន្លែងប្រជុំរបស់បណ្តាមេដឹកនាំអាស៊ាន ។ ប៉ូលិសបន្តថា បើតាមអង្គភាពមីនផ្នែកកំទេចយុទ្ធភណ្ឌ បានរកឃើញថា គ្រាប់បែកប្រើបំពង់ច្នៃ សម្រាប់ជាការបំផ្ទុះ ។ វិធានការសន្តិសុខត្រូវបានរឹតបន្តឹងខ្ពស់ នៅជុំវិញកន្លែងបើកកិច្ចប្រជុំ នៅថ្ងៃនេះ ។

អ្នកនាំពាក្យប្រធានាធិបតី លោក Ernesto Abella បាននិយាយនៅព្រឹកថ្ងៃសៅរ៍ ទី២៩ មេសា នេះថា ការផ្ទុះនោះមាន១៤នាក់រងរបួស ជនរងគ្រោះជាប្រជាជនហ្វីលីពីន ក្នុងនោះមនុស្ស៧នាក់របួសធ្ងន់កំពុងសម្រាកព្យាបាល រីឯ៧នាក់ទៀតបានចេញពីមន្ទីរពេទ្យហើយ ។ លោកបន្តថា ការផ្ទុះនេះមិនជាប់ពាក់ព័ន្ធអំពើភេវរកម្មអ្វីទាំងអស់ ហើយហេតុការណ៍នេះ ក៏មិនរំខានកិច្ចប្រជុំកំពូលអាស៊ានដែលកំពុងបន្តនោះឡើយ ។

សូមបញ្ជាក់ថា នៅព្រឹកថ្ងៃទី២៩ ខែមេសា ឆ្នាំ២០១៧ បន្ទាប់ពីពិធីបើកជាផ្លូវការនៃកិច្ចប្រជុំកំពូលអាស៊ានលើកទី៣០ ដោយលោកប្រធានាធិបតីហ្វីលីពីន Rodrigo Duterte រួចហើយ លោកនាយករដ្ឋមន្ត្រី ហ៊ុន សែន ព្រមទាំងប្រមុខដឹកនាំទាំង៩ ប្រទេសទៀត បានអញ្ជើញបន្តចូលរួមប្រជុំនៅសាលសន្នសីទ Philippines International Convention Center (PICC)។

ជាកិច្ចចាប់ផ្តើមលោកប្រធានាធិបតីហ្វីលីពីន Rodrigo Duterte បានស្វាគមន៍ប្រមុខដឹកនាំអាស៊ានទាំង អស់ដែលបានអញ្ជើញមកចូលរួមក្នុងកិច្ចប្រជុំកំពូលថ្ងៃនេះ ដែលផ្តោតលើប្រធានបទ រួមគ្នាជាដៃគូ ដើម្បីធ្វើការផ្លាស់ប្តូរ រួមចំណែកជាមួយពិភពលោក ។ លោកប្រធានាធិបតីបានបន្តថា យើងជួបជុំគ្នា ថ្ងៃនេះគឺមានទស្សនៈនិងគោល ដៅរួមឆ្ពោះទៅមុខដើម្បីផលប្រយោជន៌រួម ។ ទោះបីកិច្ចការយើងមិន ទាន់បានជោគជ័យទាំងស្រុង ហើយកំពុងមានបញ្ហាប្រឈមមួយចំនួន ក៏ប៉ុន្តែយើងពោរពេញដោយ ក្តីសង្ឃឹមថាអាស៊ាននឹងកាន់តែរីកលូតលាស់ដែលនាំមកនូវផលប្រយោជន៌ទាំងស្ថេរភាពនយោបាយ និងកំណើនសេដ្ឋកិច្ច ។ នៅក្នុងឱកាសនោះដែរ ប្រមុខដឹកនាំប្រទេសកម្ពុជា បានថ្លែងអំណរគុណចំពោះប្រជាជន និងរដ្ឋាភិបាលហ្វីលីពីន ដែលទទួលស្វាគមន៍សម្តេច និងប្រតិភូកម្ពុជាយ៉ាងកក់ក្តៅ៕

បំផ្ទុះគ្រាប់បែកចំពេលសម្តេច ហ៊ុន សែន ចូលរួមប្រជុំអាស៊ាននៅហ្វីលីពីន របួស១៤នាក់

ដំណឹងអន្តរជាតិ៖ នាវាផ្ទុកយន្តហោះ បារាំង មួយគ្រឿង ឈ្មោះ Mistral បានទៅដល់កំពង់ផែកោះ សាសេបូ (Sasebo) របស់ប្រទេស ជប៉ុន នៅថ្ងៃសៅរ៍នេះ ដើម្បីដឹកនាំសមយុទ្ធយោធាដែលមានកងទ័ព បារាំង អង់គ្លេស អាមេរិក និង ជប៉ុន បន្តរហូតដល់ថ្ងៃទី ៥ ខែ ឧសភា។

នាវាផ្ទុកយន្តហោះ Mistral មានសមត្ថភាពអាចផ្ទុកឧទ្ធម្ភាគចក្រ ៣៥ គ្រឿង មាននាវាសណ្ដោង ៤គ្រឿង ព្រមទាំងទាហានរាប់រយនាក់ ហើយអាចវាយប្រហារគោលដៅទាំងក្នុងទឹក និងលើគោក។ សមយុទ្ធយោធារបស់កងទ័ពនៃប្រទេសទាំង ៤ ធ្វើឡើងស្របពេលដែលភាពតានតឹងនៅលើឧបទ្វីបកូរ៉េស្ថិតក្នុងតំណាក់កាលមួយអាក្រក់បំផុតមិនធ្លាប់មានតាំងពីការបញ្ចប់ទៅនៃសង្គ្រាមកូរ៉េឆ្នាំ ១៩៥៣ ដោយសារការសាកល្បងគ្រាប់បែកនុយក្លេអ៊ែររហូតដល់ ៥ លើក របស់ កូរ៉េខាងជើង និងការសាកល្បងមីស៊ីលទំនើបជាច្រើនលើកទៀត។

ក្រៅពីបញ្ហាឧបទ្វីបកូរ៉េ មហាអំណាចបស្ចិមប្រទេសក៏មានបំណងពង្រឹងអំណាចយោធារបស់ខ្លួនផងដែរក្នុងមហាសមុទ្រប៉ាស៊ីហ្វិក ក្រោយពីប្រទេស ចិន បង្កើនអំណាចយោធាយ៉ាងខ្លាំងក្នុងតំបន់សមុទ្រចិនខាងត្បូង តាមរយៈការសាងសង់កោះសិប្បនិម្មិត និងបង្កើតប៉មត្រួតពិនិត្យនៅលើប្រជុំកោះដែលមានទំនាស់៕